In Nepalese Language

यो फेसबुक झर्रो साहित्यको ठेसबुक

व्याकरण र शुद्धतालाई अमिलो चूक   

उरन्ठेउला लेखकको भयो अडेसबुक

सम्पादन, समालोचन आफैं नै बुज्रुक। 

—-

फुर्यो कि लेखिहाल्यो जेजसो ट्याक्क 

फेसबुके भित्तो सजाइहाल्यो चिटिक्क 

मिल्दोजुल्दो फोटो गुगलबाट सुटुक्क 

नेटद्वारा साथीको फेसबुकमा लुसुक्क। 

—-

पढाइमा अल्छे पुस्ता बुझाइमा अकमक 

फोटो देख्न पाउँदा भने आँखामा चमक

सत्य होस् नहोस् चोटीलो होस् बकबक

भाषाविद ज्ञातागण मनै मनमा थकथक।  

—-

पढने धैर्यमा विकार सर्जक बने अमुक

लेखन पेसा सुस्तायो, जीविकामा शोक 

छापा द्रुत ओरालो बिना कुनै रोकटोक       

प्रकाशन संस्थाहरुको मन हुने ढुकढुक। 

—-

प्रविधि र परिधि दुवै नै मानवका मन्थन

समन्वयमा प्रयोग गरे कल्याणकारी छन् 

पक्षपाती बहस गर्दा प्रत्युत्पादक बन्छन् 

भाषाको लक्ष सत्य सहज संचार प्रजनन।

—-

प्रविधी प्रवर्धनले प्रकृति-धन प्राप्य बन्छन्

परिधीले प्राप्त विधालाई जनग्राह्य पार्छन् 

प्रविधीको उडान र परिधीको अनुशासन 

दुवैको सम्मतीमा हुन्छ समाजको उत्थान। 

—-

विरोधमा क्रोध मात्र छ, हुँदैन उन्नती कत्ति 

मिलापमा सहकार्य छ, मेटिन्छ सबै भ्रान्ति

झर्रो साहित्य र टर्रो प्रविधी मिलेमा क्रान्ति

यो पुस्ता मिलेर बढे सुखी बन्छन सन्तती।    

 —-

विकास संगै बाटोले फेर्छ दिशा अनि गति

विरोध हो वैरी, खोजौं मेल-बिन्दु र सम्मति 

अवरोधमा क्रोध फल्छ, सहमतिमा शान्ति 

मिलिजुली संवाद सकारे सबैमा छ कान्ति।