In Nepalese Language

मनको बाकसभरि छ आकाश

तर निकास नपाई बन्छ सिकस 

अमखराभरि नै छ स्वादिष्ट रस 

तर पोखिन नपाएर लागेको कस।

—

नसुन्नेको देशमा सुनाउनेलाई क्लेश  

श्रोता सुप्त रहँदा प्रस्तोतालाई हरेस  

नीरस सन्देश बन्छ साहित्यले सरस 

सुन्नेले नचाहे भन्नेलाई केवल सकस।

—

नेपाली संसारमा गर्न सत्य सञ्चार 

सरल समझको भाषाको दरकार 

भाषा प्रसारमा साहित्यको आधार 

साहित्य सज्जामा सन्देशको सार।

—

ईशको सत्य होस् सन्देशको आधार

सम्प्रदायको दुर्गन्धले नगरोस् प्रहार 

साहित्य नहोस् सम्प्रदायको घरबार 

सधैं होस् केवल सत्य ईशको प्रसार।

—

विचारमा छ कसरी गर्ने होला विकास

पहिले त सोचौं विकासको लक्ष खास

सत्य-सेवाको बोलीमा अनन्तको आस 

समूह-टेवाको बातमा छ तिक्ताभास।

—

सोचौं, विचारौं, भेटौं, सकारौं लक्ष सरस 

न आफ्नो न जगको, खोजौं ईशको जस

ईश योजना-पथमा जति नै रहोस् सकस

उनको साथ पाएर अवश्य हुन्छ विकास।