भ्रातृप्रेमको छ ट्याग टाँसेको 

धर्म नामले छ समाज मासेको 

कृपाको भेषमा क्रोध हाँसेको 

धर्म-विषले समाज यो डसेको।

—

धनीले स्व-धर्मको नाच नाचेको 

गरिबप्रति बल्ल सिन्को भाँचेको

भेटीमा गरिबको सुको साँचेको 

धनपरस्त भई अब धर्म बाँचेको।   

—

सिद्धान्त र शिक्षामा प्रेम बखान 

जात, वर्ण र वर्गको सदैव ध्यान 

बोलीमा मेल त व्यवहारमा झेल 

धर्म बनेछ फूट फैलाउने खेल।

—

यसको मन्दिर त उसको बुर्जा 

उसको गुम्बा त त्यसको गिर्जा 

धर्मले थमाएको बेमेलको पुर्जा 

गुटगत द्वन्दमा नै लुटायो उर्जा। 

—

ईश्वर गुरु छन् हरेकजनको इष्ट 

धर्मको नजरमा अरु सकल दुष्ट

धर्मले ईश्वरलाई दर्शायो क्लिष्ट 

ईशको नाउँमा धर्म भो’ बलिष्ठ।

—

ईश्वरको रचना हो समस्त सृष्टि 

धर्म स्थापना त नश्वरको कुदृष्टि 

धर्मले गरे आ-आफ्नै ईश तुष्टि 

ईश्वर लुकाइए धर्म भो’ प्रविष्टि। 

—

सृष्टिको उदेश्य सहअस्तित्वपक्ष

कर्ताको बुझिन्छ प्रष्ट छ यो लक्ष 

धर्मले रोपिदिए द्वन्द र वैमनस्य 

द्वन्द रोपेपछि फल्दैन सौमनस्य। 

—

निल्नु न ओकल्नु बनेकोछ धर्म 

गर्जन्छ मिचेर सृष्टिको लक्ष मर्म 

ईश्वरको मान खोस्ने गर्दै दुष्कर्म 

जानाजानी धर्मको नपोसौं चर्म। 

 —

तपाईं धर्मभीरु कि ईश्वरभक्त मित्र?

द्वन्द अक्षेम कि एकता प्रेमको चित्र? 

डरको कर कि शान्ति सौम्य चरित्र?

धर्म-बन्धन कि ईश्वरको प्रेम पवित्र?