वास्तविकताको सामना गरौँ

In Nepalese Language

सकारात्मकताको भूत लागेकाहरु भ्रम-यानमा चढी बतासमा हुइकिंदैछन्;

नकारात्मकताको बाक्लो सिरकमा लुकेकाहरु आँखा चिम्लेर निदाएकाछन्। 

वर्तमानमा विद्यमान वास्तविकताको सत्य सामना गर्न ती दुवै नै चुकेकाछन्। 

—  

सकारात्मकताको प्रचारमा खप्पिस वाक-व्यापारीले भ्रमको मिठाई बेच्छन्,

मनोवैज्ञानिक वशीकरणमा सहभागीलाई विदेशी बाँदर-नाच नचाउँदछन्;

हालको वास्तविक सत्यतालाई भ्रम बताउँदै ज्यालामा मोटो रकम असुल्छन्। 

नकारात्मकताको निराशाले आफैं ग्रस्त भएकाहरु छिमेकीलाई तर्साउँछन्,

विनाशको चिन्ता र फिक्रीको गुनासोको रासले भयानक संत्रास फैलाउँछन्;

वास्तविकता र आसको विकासप्रति आँखा टम्म चिम्लेर जीवन सुकाउँछन्। 

एकपक्ष मात्र अति भएमा तराजुको सन्तुलनमा खति अवश्यम्भावी बनिन्छ,

वर्तमान सत्यको वास्तविकतालाई आशामा डटेर सामना गरेमा निकास छ;

सकारात्मक र नकारात्मक केवल भ्रमका भकारी, मात्र वास्तविक सत्य छ। 

भावनाको भेराइटी

In Nepalese Language

कतै स्विजरल्याण्ड त कतै हैटी 

रोमाञ्चकारी स्पर्श कि बजारिने मुक्का,

पुष्प-वृष्टिको बहार कि चट्याङ वर्षाको कहर 

आज मित्रको मनको भावना कुन मूडमा होला –

मधुर धुन गुनगुनाउने कि झर्कोमा खोपडी झनझनाउने?  

भावना त केवल स्वमनको परिकार 

स्वाद कि बेस्वाद मन-मालिक कै हात 

मनभित्र स्वादको शुरुवात गरिदिनोस् मित्र 

शीतल, सुन्दर, झपक्क उज्यालो बन्छ सर्वत्र।  

शुभकामना छ लिनेजति सबै बन्धुबान्धव प्रति 

अन्तरमन पुकलित रहोस्, अँध्यारो नहोस् कत्ति 

मनको खुशी नै उर्जा बनोस्, भित्र्याउने समुन्नति 

समाजमा खुशी छर्दै बितुन् जीवनका दिन जति।  

विकासको आस

In Nepalese Language

बिता पल भइगयो इतिहास 

सदा होस आउनेको आस,

आशा नभए सबै नै हताश 

हताशको फसलमा विनाश।  

भोलिको आसमा रसिक रस 

आशाले सिंचित जीवको स्वास,

देह त स्वासको छोटो प्रवास

सत्कर्मले बन्छ प्रवास विलास। 

—  

रोजौं स्वार्थी अहंकारको नाश

बनौं नम्र र ओमकारको खास, 

गरौँ, दिलाउँ र फैलाउँ आस  

बनिंदै बनाउँ यो समाज सरस।

रुढीको कारक प्रकृति विनाश 

जगमा जीव र निर्जीवको बास,

जीव जीविकाको प्रकृतिमा रास

मिलेर गरौँ प्रकृति पक्ष विकास।