आस्थाको वास्ता

विज्ञको ज्ञान भनी विज्ञान सकार्दा 

अनभिज्ञको अज्ञानले लगायो पर्दा, 

दृश्य प्रमाणमा एकतर्फी भर गर्दा 

भ्रमले छोप्यो अध्यात्म नस्वीकार्दा। 

दृश्य भन्दा अदृश्यलोक विशाल छ

मन, विवेक, भावको बढी चाल छ,

विज्ञानमा केवल भौतिक पहल छ

जगमा अभौतिकको ठूलो बल छ।

सृष्टिमा अगम्य वस्तु तथा विधि थान

भण्डारबाट खोजेर झिक्दछ विज्ञान

सृष्टि-ज्ञान त केवल ईशमा विद्यमान

बुझ्नै नचाहनेलाई के ज्ञान के विज्ञान।

गुनासो: समाज सुधार भए पो आविष्कार बन्छ साकार

In Nepalese Language

ज्ञान जब बन्न पुग्छ भ्रष्टाचारीको लाचार शिकार

आविष्कार तब बन्छ लालची व्यापारीको हतियार,

समाजमा देखिन्न सुधार, जता हेर्यो त्यतै विकार।

ज्ञान प्रयोगको सारमा, खोजिन्छ शान्तिको बहार,  

अहंकारको हुँकारमा ज्ञान बन्यो संहारको औजार,  

जीव प्रकृतिको सन्तुलनमा दुष्टको लोभी व्यवहार।

शक्ति केन्द्रको आडमा प्रकृतिमाथि खुंखार प्रहार, 

द्रव्यपिचासको दुष्ट मारले ओखती नै विष-भण्डार,   

ज्ञान दुरुप्रयोगको परिणामले आक्रान्त सब संसार।

विश्लेषण गरिएको ज्ञानको ‘विज्ञान’ नामले प्रचार

विज्ञानले जनमा दिनुपर्ने सत्य, शान्ति र सदाचार,

तर उपहारमा मिल्यो बन्धन, अशान्ति र दुराचार।

विज्ञान बन्यो आडम्बरी शोषक शक्तिको हतियार 

विज्ञानको उपजमा व्यापारी अनि शासक मतियार

परिणामको दुष्प्रयोगले आविष्कार हुँदैछन् बेकार।

ज्ञानवृद्धिमा सहकालको आस, वृद्धिमा छ भोको मुहार

आशामा स्वास्थ्यको सुधार, तर बढ्दोछ व्याधिको मार 

समाज झनझन कमजोर, त्रसित, आक्रोशित, लाचार।      

गलपासो: समाज सुधार नगर्दा आविष्कार बन्दैछ विष-भार।