पात पतिङ्गर कसिङ्गर सोहोरी सारा जङ्गल 

ढाँटेर बताए तिनलाई खीलधारी अरिङ्गाल, 

सत्य यिनमा छैन, सर्वत्र छलैछलको छाल 

जनता सधैं गरीबीमा, धूर्त नेता मालामाल।  

—

देशले उम्दा विकास गरेको गर्दैछन दाबी 

विकासधारी ट्याङ्काको यी खोल्दैनन् चाबी,

शायद नेताले मात्र देख्ने विकास होला हाबी 

त्यो नदेख्ने जनताको आँखैमा पो छ खराबी।   

—

सत्र हजार टाउका गिंड़ी गुथिसक्यो माला

जरायोको टाउकोमा सिङको छैन चाला, 

छिमेकीले भिराइदिए बाह्र सिङको टाला 

‘मेरा सिङ वापस करो’ भन्दा सातो जाला। 

—

गर्नै नपर्ने झैं सबै गर्ने हाँक दिंदथे पहिले 

हुँदाहुँदै नभएका पनि भए भन्छन् अहिले,

विनाशकाले विपरीत बुद्धि बुझिने बोलीले 

जनता जति खुत्रुक्कै नेताको बोली-गोलीले।  

—

नीति-नियम विधि-विधान केवल नेतामुखी 

नेता पोष्ने, कारिन्दा तान्ने, बनाइ तीनै सुखी,

नाउँले जनसेवक,कामले जनता पार्ने दुखी 

नेता मात्र उकास्ने विधान अब बुझ्यौं चाखी।  

—

आस्थाको लेपले पोतेको तीतो विकृत नीति

छली नेताले पस्किए भन्दै यही हो राजनीति,

कटुताको विषका अम्मली पारिए जन जति 

जनताको कर बन्यो नेताको निजी सम्पत्ति।   

—

यी फेरि भट्याउँदैछन् बेमौसमी भोट भजन

भोट भन्दै राजकोषबाट अर्बौं हुने हो भाजन,

देश र जनताको समुन्नतिमा नेताको छैन मन 

जनता सधैं कङ्गाल, नेता बन्ने धनाढ्य राजन।

—

घोटीघोटी प्राप्त त्यही पुरानो खिसीको ओखती 

घिसीपिटी उत्पादित गालीगलोचको निम्न कोटी

चोटीका नेता भनाउँदाहरु कुन खालका गोटी?

भ्रष्टाचारको पालो नपाउँदाको प्रष्ट भो’ छटपटी। 

—

जनताको पसिनाले जोहो गरेको सामल पानी

निर्लज्ज लुट्छन यी नेताले कुनै सङ्कोच नमानी,

चर्को कर असुल्दैछन् हाम्रै पेटमा लात्ती हानी

के आधारमा भोट दिने यी भ्रष्टका बानी जानी? 

—

भोटद्वारा यिनलाई लुटको लाइसेन्स पो दिएछौं 

तब बानी नचिनेर आफ्नै घुँडामा खुँडा हानेछौं,

लौ फेरि छली भोटको यिनको नाटक देख्दैछौं

होस नगरी यिनैलाई छाने, फेरि पङ्गु बन्नेछौं।